काठमाडौं । जिल्ला प्रहरी कार्यालय रौतहटमा कार्यरत प्रहरी सहायक निरीक्षक (ASI) रागनी कुमारी यादव नेपालभरकै ‘सर्वोत्कृष्ट प्रहरी’को रूपमा सम्मानित भएकी छन्।
लैंगिक हिंसाविरुद्धको १६ दिने अभियानका अवसरमा आइतबार आयोजित विशेष कार्यक्रममा नेपाल प्रहरीका महानिरीक्षक (IGP) दानबहादुर कार्कीले यादवलाई ४० हजार रुपैयाँ नगद र प्रशंसापत्रसहित प्रथम घोषित गरेका हुन्।
महिला, बालबालिका तथा ज्येष्ठ नागरिक सेवा केन्द्रको नेतृत्व गरिरहेकी यादवले विभागीय नीति निर्देशनको अनुकरण, लैंगिक हिंसा घटाउने गतिविधिमा प्रभावकारी भूमिका र उत्तरदायी सेवा प्रवाहमा विशेष योगदान पुर्याएकाले उनी उत्कृष्ट घोषित भएको प्रहरी प्रधान कार्यालयले जनाएको छ।
रौतहटको गरुडा इलाका प्रहरी कार्यालयमा दरबन्दी भएकी उनी हाल जिल्ला प्रहरी कार्यालय रौतहटमै कार्यरत छन्।
दोस्रो स्थानमा प्रहरी हवल्दार शान्ता खत्री परेकी छन्। अर्घाखाँचीमा दरबन्दी भई हाल कपिलवस्तुमा कार्यरत खत्रीले ३० हजार रुपैयाँ र प्रमाणपत्र प्राप्त गरिन्।
तेस्रो स्थानमा प्रहरी हवल्दार उमा तामाङ चयन भईन। जिल्ला प्रहरी कार्यालय सिन्धुलीकी तामाङले २० हजार रुपैयाँ र प्रशंसापत्र प्राप्त गरिन्।
कार्यक्रममा प्रहरी नायब निरीक्षक पूर्णिमा थापा र प्रहरी सहायक निरीक्षक साजना प्रसाईलाई १०–१० हजार रुपैयाँसहित सान्त्वना पुरस्कार प्रदान गरिएको थियो।
आर्थिक वर्ष २०८१/८२ को लैंगिक हिंसा तथ्यांक सार्वजनिक कार्यक्रमको अवसरमा देशभरका महिला, बालबालिका तथा ज्येष्ठ नागरिक सेवा केन्द्रहरूमा कार्यरत प्रहरी कर्मचारीहरूको कार्यसम्पादनको मूल्यांकनपछि उत्कृष्ट प्रहरी कर्मचारी छनोट समितिले नाम चयन गरेको हो।
